Prestosa xornada del vienres

Ayeri tuvimos los primeros conciertos de N'Alcordanza nel Toma3, The Class y la fiesta nel Muddy's. L'ambiente foi bien prestosu, sirvió de bona pista de llanzamientu pa la xornada de güei. Dexámosvos equí dalgunes semeyes de lo d'ayeri, de mala calidá pero de innegable valor documental ;).

Boni Pérez

Boni Pérez nel Muddy's

Cholo lleendo'l manifiestu

Los Izquierdos

Los Izquierdos

Moonglow

Moonglow

Los Testigos

Los Testigos

Entrevista en Radio Kras

Equí podéis sentir una entrevista nel programa Marabayu de Radio Kras. Boni Pérez, que sabe contalo.

Y finalmente, entamamos.

Yá ta, güei vienres echa andar N'Alcordanza. A les 20:00 hores nel Toma3, Monnglow, y depués a partir de les 21:30 nel The Class Los Izquierdos y Los Testigos.

Los Izquierdos

N'Alcordanza 2013 en El Comercio

Equí podéis ver lo qu'apaez hoi en "El Comercio":
http://www.elcomercio.es/v/20130627/cultura/once-escenarios-para-igor-20130627.html

N'Alcordanza 2013 en La Nueva

Equí podéis ver lo qu'apaez hoi en "La Nueva España":
http://www.lne.es/gijon/2013/06/27/bandera-igor-medio-carlos-redondo/1433857.html

N'Alcordanza 2013 n'Asturies.com

Equí podéis ver lo qu'apaez hoi n'Asturies.com:

http://www.asturies.com/noticies/%E2%80%9Cigor-y-carlos-foron-fundamentales-na-m%C3%BAsica-asturiana-de-los-a%C3%B1os-%C3%BAltimos%E2%80%9D-afirma-boni-p%C3%A9r

La rueda de prensa de N'Alcordanza nos medios

El Comercio y La Nueva España espublicen güei información sobre la rueda de prensa que dimos ayeri. Nel Café Trisquel, que ye onde se convocó a los medios, falamos otra vuelta de la filosofía del festival, el manifiestu y de dalgunes novedaes nel cartel.


Noticia en La Nueva España.

Noticia n'El Comercio.

Entrevista na Radio en Vivo del Muddy's

Yá podéis sentir el programa Sin Pudor de la Radio en Vivo del Muddy's nel que nos entrevistaron el sábadu pasáu pa falar de N'Alcordanza. Presentáu por Arantxa Nieto, falamos de música asturiana, de qué representaron pa la música Ígor y Carlos, del manifiestu y de tolo que pasar los próximos 28 y 29 de xunu.

Cambiu nel cartel, Los Testigos por Lucas y Los Patosos

Recordavos un cambiu qu'hai con respecto al cartel que pudistéis ver per ende. Na sala The Class, el vienres pela nueche, nun van tocar Lucas y Los Patosos, sinón Los Testigos, yá que a los primeros surdió-yos un problema d'ultima hora cuando yá taben los carteles n'imprenta. Los Testigos son un grupu de versiones de los 80 que nos parez qu'encaxen perbien col rock de Los Izquierdos, los sos compañeros d'escenariu en N'Alcordanza.

Güei, n'alborada de San Xuan, un momentín pa Ígor y Carlos

Dientro una selmana vamos tar viviendo los conciertos de N'Alcordanza, disfrutando de la música, viendo collacios que va tiempu que nun vemos y repitiendo nun montón de sales un manifiestu pa qu'Ígor y Carlos tean arguyosos de nós.

Pero güei, 23 de xunu, 7 años depués, vamos danos un momentín, caún ondequiera y comoquiera, p'alcordanos de los collacios que marcharon, porque si dempués d'esti tiempu Ígor y Carlos merecen dalgo ye que pongas un cantar, busques una semeya, restoles hasta alcontrar la entrada d'aquel conciertu o simplemente, nun momentu dáu, llevantes un vasu y digas, gracies.

Incorporación a la tonada, el gaiteru Llorián García

Como sabéis, esti añu tenemos tonada en N'Alcordanza, en concretu un par de voces de renome como son Ismael Tomás y Mariluz Cristóbal. Pues p'acabar de completar el menú na Sidrería Canteli, que ye onde va ser la sesión de canción asturiana, vamos tener al gaiteru Llorián García, que va acompañar a los cantantes pa facer el repertoriu más variáu.

Llorián conocíu sobre too por ser el gaiteru de Dixebra, tamién fai trabayu d'investigación alredor de la música tradicional, lo que completa cola so formación de musicólogu.

Nesti vídeu podéis ver precisamente a Llorían acompañando a Mariluz.

Ayeri tuvimos nel Muddy's

Una semeya de la entrevista d'ayeri nel Muddy's con Arantxa Nieto falando de N'Alcordanza .

El manifiestu de N'Alcordanza 2013, coses qu'hai que dicir

Como bien sabéis, N'Alcordanza nun ye solo un alcuentru de músicos, músiques, públicu y locales, tamién ye una reclamación o una llamada d'atención a la situación de la música n'Asturies y de les persones que la faen posible. Nun dexéis de lleer el manifiestu y de, si tenéis oportunidá, espardelu per ende. Tenéislu equí pa ver y descargar.

MANIFIESTU N’ALCORDANZA D’ÍGOR Y CARLOS 2013

Hai yá siete años que perdimos a Ígor Medio y Carlos Redondo, músicos,
productores, editores... activadores culturales en definitiva.

Tol mundu coincide en señalalos ente los más grandes nel so xéneru musical.
Lo qu’igual nun sabe tol mundu ye qu’amás de too esto, foron trabayadores
precarios de la música, poro, lo que se-y escapa a muncha xente ye que
l’accidente que nos quitó a Carlinos y Figor foi un accidente llaboral, que nun
figura como tal precisamente por eso, pola precariedá.

La mesma precariedá llaboral que siguen soportando la mayor parte de los y
les trabayadores de la música asturiana. Por eso, nun queremos facer
alcordanza d’Ígor y Carlos ensin más, queremos facer llegar a tola sociedá
dellos esmolecimientos de los y les trabayadores de la música.

1- El sistema de cotización, de desemplegu, d’altes y baxes qu’anguaño
esisten y afueguen a los y les trabayadores de la música, tien que modificase,
por exemplu, deprendiendo de lleis esistentes nos estaos de la nuestra
contorna. Tien qu’acabase que los y les trabayadores namás coticen el día
que toquen.

2- La música en directo ta amenazada tanto poles instituciones locales,
autonómiques y estatales como poles sociedaes que dicen defender los
drechos de los autores. Tien qu’acabar d’una vez la persecución a les
actividaes musicales desendolcaes en locales. La música ye cultura y la
cultura ayúdanos a ser meyores persones.

3- La música asturiana nel so conxuntu tien de ser considerada como una
industria más. Ye necesario un circuitu profesional pa los músicos
d’Asturies. La presencia de la nuestra música nes promociones
audiovisuales, asina como nes feries musicales, turístiques, o en
cualquier actividá de promoción de “la marca Asturies” tien de ser una
obligación pa les nuestres instituciones.

Asina que: N’alcordanza d’Ígor y Carlos, pola pervivencia de la música. Que vos
preste’l conciertu.

Güei tamos na Radio en Vivo del Mudd'ys

Güei de nueche, a eso de les 23:00 vamos tar nel Muddy's (cai Santa Elena 21) pa participar na Radio en Vivo, inciativa d'esti local p'averar la música y la cultura la públicu, per aciu d'una radio en directo, podéis tomar dalgo ellí mientres veis como se fai'l programa, pa dempués colgar el programa n'internet pa que se pueda descargar y sentir cuando y ondequiera. Vamos tar Ruma Barbero, Boni Pérez y Rubén Ardura, la entrevistadora va ser Arantxa Nieto, y ellí falaremos de tolo que tien que ver con N'Alcordanza y de xuru que de dalguna cosa más.

.

Un cantar de Luís Dadá

Luís Dadá, el que fuera componente del grupu Salón Dadá, va tar N'Alcordanza, concretamente a les 20:30 hores nel Patio de la Favorita el sábadu 29. Anque Salón Dadá va años que nun funciona, Luís sigue dándo-y a la música, y l'añu pasáu espublizó un discu col nome de Nada. Dexámosvos equí un vídeu d'un cantar d'esi discu.

Documental sobre'l discu del cuartetu de Carlos Pizarro

L'espaciu pal jazz en N'Alcordanza va ser nel Alambique, el sábadu 29 a la una. Ellí van tocar Horacio García, Felix Morales, Javier Rubio y Carlos Pizarro. Esti caberu ta acabante de sacar un discu, La Voz del Arbol, y equí podéis ver un documental sobre'l procesu de creación del trabayu discográficu. Nél podemos ver les impresiones de Carlos Pizarro y los músicos participantes, asina como de Gus Zarrilo, responsable del Café Alambique ya impulsor del proyectu. Un bon aperitivu.

Escucha la entrevista en RPA

El xueves 20 entrevistaron a Ruma Barbero y Rubén Ardura nel programa El Tren de la radiu autonómica asturiana, la RPA. Elli, xunta col presentador Naciu Varillas, repasamos tolos conciertos de N'Alcordanza y les principales idegues del manifiestu de N'Alcordanza.

N'Alcordanza 2013 en Pieces.

Como vos dicíamos, ayeri, entrevistáronnos nel programa Pieces de la TPA. Equí podéis venos (más o menos pol minutu 22) contando a qué vien esto de N'Alcordanza..

http://www.rtpa.es/video:Pieces_551371777245.html

Esta nueche, N'ALCORDANZA 2013 en PIECES

Adelantu del programa "Pieces" d'esta nueche, con un apartáu dedicáu a N'Alcordanza 2013.

Toli Morilla vs. El Tamar, un adelantu

En La Vida Alegre van coincidir dos personalidaes de la música asturiana, Toli Morilla y El Tamar (Pablo Tamargo). Pa poder dir faciéndose una idega, equí van dos de les coses qu'estos músicos son capaces de facer. Per un llau, Toli Morilla actuando nel que foi'l primer N'Alcordanza, cantando, xunta una bona montonera de músicos folk, "Como la Flor", cantar del discu "Dual" d'Ígor Medio y Lisardo Prieto. D'otra banda tenemos l'iviernu post nuclear d'El Tamar, cantar del discu que fexo casi en solitariu esti guitarrista, amén de más coses.

ARTÍCULOS N'ASTURIES.COM Y ARUELU

Pablo R. Guardado espubliza güei n'Asturies,com una noticia enforma llarga sobre N'Alcordanza, convidamosvos a que-y echéis una gueyada. Tamién Aruelu.com espublizó información.

YÁ TAMOS EN TWITTER

Lo que nos faltaba, yá tamos en Twitter, asina que los qu'andéis per esa rede podéis topanos en @nalcordanza.

REFERENCIES Y NOTICIES

Mondosonoro, la revista musical especializada, que podéis topar n'internet y en papel, espubliza na so páxina una noticia sobre N'Alcordanza. Pela so parte, Pauline en la Playa yá da anuncia na so web de la so actuación, que va ser nel Buddha pesllando'l N'Alcordanza xunta Nacho Vegas y Radio Fox.

ISMAEL TOMÁS Y MARILUZ CRISTOBAL CAUNEDO

El sábadu 29 a les 14.30 h. tarán cantando na sidrería Canteli, c/ Almacenes, Ismael Tomás y Mariluz Cristobal Caunedo. Nada menos.

DRD y SEU

A les 19.00 h. más folk n'Alcordanza d'Ígor y Carlos nel Café Trisquel, c/ Marqués de San Esteban 30.

CAZURRÍN, TUENDA Y FELPEYU

Nel Ca Beleño, na cai  Rodríguez San Pedro 39, a les 17.30 h. del sábadu 29 de xunu, vamos ver a Cazurrín, Tuenda y Felpeyu.

 

LOS IZQUIERDOS Y LOS TESTIGOS

El vienres 28, a les 21.30 h. taremos na sala The Class, na Avd. Torcuato Fdez-Miranda 2, viendo a Los Testigos y a Los Izquierdos.


 

TOLI MORILLA vs. EL TAMAR

El sábadu 29 a les 14.30 h. en "La Vida Alegre", c/ Buen Suceso 8. Toli Morilla vs. El Tamar. http://bcove.me/pa2hu9z2

Artículu en La Nueva España

El periodista Jose Luís Argüelles del periódicu La Nueva España, espubliza güei esti artículu nel que fala de N'Alcordanza d'esti añu. Préstanos abondo porque fai rescamplar abondo la cuestión revindicativa faciendo entesacaos del manifiestu, que si tovía nun lleisteis ya tardáís, tenéislu nesta páxina na pestaña Cartel y Manifiestu.

Cambiu nel conciertu de The Class

Tuvimos que facer un cambiu ne conciertu del The Class del Vienres 28 porque nun podíen Lucas y Los Patosos. Nel so llugar, van tar Los Testigos, grupu mui prestosu de versiones ochenteres.

Ésti ye'l comunicáu que mandamos a prensa

N'Alcordanza 2013 celébrase en Xixón con un mensaxe revindicativu el 28 y 29 de xunu

Más de 20 grupos asturianos en 11 locales de Xixón van recordar a los desaparecíos músicos Ígor Medio y Carlos Redondo, con un festival decaracter reivindicativu llamando l'atención sobre la situación de la música asturiana al traviés d'un manifiestu.

N'Alcordanza ye'l nome del festival que representa'l recuerdu a los músicosÍgor Medio y Carlos Redondo, desaparecíos n'accidente de tráficu nel añu 2006. Dende entós p'acá, tolos meses de xunu celebrábase una xunta de grupos y amigos pa recordar a los compañeros  desaparecíos. En 2013 esti alcuentru dio un saltu, y cola collaboración de les y los músicos asturianos, y un bon  númberu de locales de la ciudá de Xixón, van celebrase dos díes de música en directu como forma d'alcordanza, pero tamién como llamada d'atención sobre la situación llaboral na que viven los profesionales de la música n'Asturies. Asina, antes de cada actuación, va lleese un manifiestu que recueye delles de les reivindicaciones qu'esmolecen a les y los músicos.

Ente los grupos que van actuar a lo llargo d'esos dos díes tán xente comoFelpeyu, Nacho Vegas, Los Izquierdos, Mariluz Cristobal Caunedo, DRD, Toli Morilla, Pauline en la Playa, El Tamar, Carlos Pizarro...etc  y un montón más, que van enllenar Xixón  de música, alcordanza y reivindicación.

N'ALCORDANZA 2013

Como tolos años dende fai siete,  vamos facer dellos conciertos n'alcordanza d'Ígor Medio y Carlos Redondo a finales del mes xunu. Pero nesta edición queremos dir un pasiquín más allá, y entamar lo qu'eperamos vaiga afitándose colos años nuna xornada de vindicación de los y les trabayadores de la música. Dexámosvos equí'l programa y el manifiestu d'esti añu. Diremos dando más detalles.